“Arsenal” Benjamin Šeško üçün danışıqlara başlayıb

Bakı, 24 may, Tsport.az

İngiltərə Premyer Liqasının nəhəng klublarından olan “Arsenal”, Almaniya Bundesliqası təmsilçisi “Leipzig”in hücumçusu Benjamin Šeškonu transfer etmək niyyətindədir.

Tsport.az xəbər verir ki, London klubu artıq 21 yaşlı sloven hücumçu ilə bağlı konkret danışıqlara başlayıb.

Šeškonun “Leipzig”lə 2029-cu ilin yayına qədər qüvvədə olan müqaviləsində 80 milyon avro məbləğində satınalma bəndi mövcuddur. Bu, “Arsenal”ın onun transferi üçün ciddi maliyyə planlaması aparmalı olduğunu göstərir.

Qeyd edək ki, Benjamin Šeško cari mövsüm ərzində “Leipzig” formasında bütün yarışları nəzərə alaraq 45 oyunda 21 qol və 6 məhsuldar ötürmə ilə yadda qalıb. Gənc hücumçunun bu çıxışı Avropanın bir sıra top klublarının diqqətini cəlb edib.