Əsl çempionlar yalnız hücumda yox, müdafiədə də tarix yazırlar
Bakı, 2 iyun , Tsport.az
Futbol meydanında hər kəs qəhrəman ola bilməz. Qələbə yalnız irəlidə qol vuranların işıltısı ilə ölçülmür. Bəzən əsl döyüş, müdafiənin dərinliklərində, səssiz müharibənin ortasında baş verir. Və bu səssiz müharibənin ən cəsarətli sərkərdələrindən biri də Pepe idi. Onun ayaqları futbol topuna toxunduğu an, meydan bir döyüş meydanına çevrilirdi. Tər, gərginlik və amansız iradə-onun oyununun üç əsas sütunu idi.
Pepenin futbol taleyi Braziliyanın isti sahillərində başlayıb, lakin onu dünyaya tanıdan Portuqaliyanın qürurudur. Gənc yaşlarında Avropaya üz tutdu və qısa müddətdə müdafiənin sütunu olmağa başladı. Porto klubunda ilk günlərindən meydanda rəqiblərin ruhunu titrədən sərt oyun tərzi ilə seçilirdi. Real Madrid forması isə ona futbol tarixinin ən unudulmaz müdafiəçilərindən biri olmağa imkan verdi.
Onun meydandakı varlığı qorxunc bir əfsanə kimi idi—hücumçular onun gözlərinin içinə baxanda bilirdilər ki, burada güzəşt yoxdur. Rəqibin hər bir hücumunda o, bir qalxan kimi qarşısına çıxır, meydanda bir döyüşçü kimi mübarizə aparırdı. Onun hər təkəri, hər cəsarətli müdaxiləsi futbolun melodiyasını daha sərt bir ritmə çevirirdi.
Pepe-nin futbol hekayəsi təkcə kuboklarla yazılmayıb. UEFA Avropa Çempionatı 2016-da Portuqaliya yığmasının müdafiəsində durduğu anlar futbol tarixinə qızıl hərflərlə həkk olundu. Bu finalda onun ayaqları yorulmadı, iradəsi sarsılmadı, gözləri bir an belə qorxu sezilmədi. O, meydanda bir general idi—matçın hər anını idarə edən, müdafiəni qalanın divarları kimi möhkəmləndirən bir lider.
Futbol yalnız zərif ötürmələrlə ölçülmür. Bəzən futbol, bir oyunçunun meydanda sərgilədiyi mental güclə, heç kimin gözləmədiyi anda ortaya qoyduğu qətiyyətlə yazılır. Pepe-nin adı qələbə rüzgarlarının gücündə həkk olunmuşdu—o, geri çəkilməyən, hər döyüşü sonuna qədər aparan bir əfsanə idi.
Və bu gün, müdafiəçilər onun ayaq izlərinə baxıb öyrənirlər—qorxmaz olmağı, meydanda yalnız fiziki yox, mental güc sərgiləməyi. Çünki əsl çempionlar yalnız hücumda yox, müdafiədə də tarix yazırlar.
Bahar Rüstəm
