Hesabat: Ötən yaz Chiefs baş məşqçisi Andy Reid’in ofisinə güllə atılıb
Bakı, 21 avqust, Tsport.az
“Kansas City Star”ın çərşənbə günü yaydığı məlumata görə, ötən yaz Kansas City Chiefs baş məşqçisi Andy Reid’in komandanın məşq mərkəzində yerləşən ofisinə, özü də içəridə olduğu vaxt, güllə atılıb.
Tsport.az xəbər verir ki, Star’ın bir neçə mənbəyə istinadla yazdığına görə, hadisə 2024-cü ilin may ayının əvvəlində baş verib. Reid təkbaşına ofisində işləyərkən, binanın çölündən açılan atəş nəticəsində güllə pəncərənin şüşəsini və jalüzləri deşərək içəri girib və divara ofisin giriş qapısı ilə hamamının arasına ilişib qalıb. Hadisədən qısa müddət sonra klub pəncərələri gülləkeçirməz şüşə ilə əvəzləyib.
Star’ın məlumatına görə, daha iki güllə də baza binasına dəyib: onlardan biri üçüncü mərtəbəyə, digəri isə çöldə yerləşən kondisioner qurğusuna tuş gəlib. Hadisə barədə klubun daxilində çox az adamın xəbəri olub.
“Chiefs”in sözçüsü isə çərşənbə gecəsi AP’yə açıqlama verməkdən imtina edib.
Qeyd edək ki, insident Reid’in “Chiefs”ə ardıcıl ikinci Super Bowl çempionluğunu qazandırmasından və beş il ərzində üçüncü titulunu əldə etməsindən bir neçə ay sonra baş verib. Komanda ötən mövsüm də AFC çempionu olub, lakin finalda “Philadelphia”ya uduzub.
Reid Chiefs’də 12, Eagles’də isə 14 mövsümdə ümumilikdə 273-146-1 göstərici əldə edib. O, NFL tarixində qələbə sayına görə Don Shula, George Halas və Bill Belichick’dən sonra dördüncü yerdədir.
Zəhra Mansırova
