RAMİL ŞEYDAYEV “QARABAĞ”DA
Bakı,19 sentyabr , Tsport.az
“Qarabağ” klubu daha bir futbolçunun keçidini reallaşdırıb: Azərbaycan millisinin futbolçusu Ramil Şeydayev heyətə cəlb olunub.
Tsport.az xəbər verir ki, 29 yaşlı hücumçu arasında 1 illik müqavilə imzalanıb. Şeydayev “Qarabağ”da 77 nömrəli forma ilə çıxış edəcək.
Ramil Şeydayev 2017-2018 və 2021-2023-cü illərdə də “Qarabağ”da forma geyinib. O, komandamızla 3 dəfə Azərbaycan çempionu olub, 1 dəfə ölkə kubokunu qazanıb. 2022/23 mövsümündə 22 qolla Premyer Liqanın bombardiri adına sahib olub.
Azərbaycan milli komandasında keçirdiyi 69 oyunda 10 qol vuran forvard karyerası ərzində “Zenit”, “Rubin”, “Krılya Sovetov”, Moskva “Dinamo”su (hamısı Rusiya), “Trabzonspor”, “Kocaelispor” (hər ikisi Türkiyə), “Jilina” (Slovakiya), “Buriram Yunayted” (Tailand), ölkəmizdə isə “Sabah” və “Neftçi”də çıxış edib.
Qeyd edək ki, “Qarabağ” klubu bunadək altı futbolçunu – Dani Bolt, Pedro Bikalyo, Kris Kuaku, Sami Mmae, Joni Montiel və Kamilo Duranı heyətinə qatıb.
Aytac Mustafayeva
