“Sabah” və “Araz-Naxçıvan”ın rəqibləri bəlli oldu

Bakı, 4 avqust, Tsport.az

Bu gün UEFA Konfrans Liqasının pley-off mərhələsinin püşkatma mərasimi İsveçrənin Nyon şəhərində baş tutub.

Tsport.az xəbər verir ki, püşkatma nəticəsində Azərbaycan təmsilçiləri “Sabah” və “Araz-Naxçıvan” klublarının potensial rəqibləri müəyyənləşib. Hazırda hər iki komanda turnirin 3-cü təsnifat mərhələsində mübarizə aparır.

• “Araz-Naxçıvan” bu mərhələdə Kiprin “Omoniya” klubu ilə qarşılaşacaq.
• “Sabah” isə Bolqarıstan təmsilçisi “Levski” ilə üz-üzə gələcək.

Püşkatmada “Araz-Naxçıvan” – “Omoniya” cütü səpələnmişlər səbətində yer alıb. Bu, Kipr klubunun UEFA reytinqində yüksək mövqeyə sahib olması ilə əlaqədardır. “Levski” – “Sabah” cütü isə səpələnməmişlər səbətində qərarlaşıb.

Potensial rəqiblər:

• “Sabah” – “Levski” cütünün qalibi pley-off mərhələsində “AZ Alkmaar” (Niderland) – “Vaduts” (Lixtenşteyn) cütünün qalibi ilə qarşılaşacaq.
• “Araz-Naxçıvan” – “Omoniya” cütünün üstün tərəfi isə UEFA Avropa Liqasının PAOK (Yunanıstan) – “Volfsberger” (Avstriya) cütünün məğlubu ilə görüşəcək.

Qeyd edək ki, İngiltərə təmsilçisi “Kristal Pelas” klubunun turnirdə iştirakı hazırda davam edən hüquqi proseslər səbəbindən qeyri-müəyyəndir. Pley-off mərhələsinin oyunları 21 və 28 avqust tarixlərində keçiriləcək.